Rro-kje ne kryq

Autori i Rro-kje në kryq është i njohur si poet, eseist dhe prozator. Të tria këto fusha të krijimtarisë i kanë shërbyer për të shkruar një libër më vete, por jo vetëm për veten. Rro-kje në kryq është një roman-ese, me personazhe dhe ngjarje reale, një rrëfim tronditës për një dhimbje e fatkeqësi njerëzore, një provë e guximshme dhe mbresëlënëse. I vetëdijshëm dhe krenar për kryqin e dhimbjes së vet, autori ngrihet mbi të, për të na dëshmuar së zëri i vërtetë i njeriut dhe shkrimtarit nuk gjendet në laring, por në ujëvarat e shpirtit ku derdhen zërat e tokës e të qiellit, të mirësisë e të dashurisë së atyre që ke afër dhe larg, të njohur e të panjohur, të gjallë e të vdekur. Lexuesi merr në duar një roman që përpiqet të zotërojë demonët e gjuhës e të shprehjes, i shkruar mes ëndrrës dhe zhgjëndrrës, për të përballuar sfidat ekzistenciale të qenies dhe krijimit. Lëvrues i talentuar i esesë dhe prozës së gjatë, Pirro Loli, përmes një stili të mprehtë e dinamik, ndërthur mjeshtërisht detajin me rrëfimin, realitetin me mitet, të zakonshmen me universalen, deri në udhëkryqet e absurdit.