5 diamantet zeiter

Ai është aty mes të mëdhenjve. Quhet Enis Banaj dhe është 15 vjeç. Enisi ka vendosur të sjellë para lexuesit pesë diamante që mund të vendosin, ose të shkatërrojnë paqen. Ngjarjet i ka vendosur në vitin 2367. Një takim me alienët të fton të njihesh me pjesën e parë të këtij vëllimi të parë... Më pas ngjarjet rrjedhin natyrshëm, një nga një shfaqen edhe personazhet. Mes tyre edhe Zeiter, një personazh misterioz, emri i të cilit vjen nga gjuha gjermane, që do të thotë kohë. Libri është i lidhur ngushtë me këtë koncept. Në këtë përballje të parë me publikun Enis Banaj ka vendosur të shkruajë për të ardhmen, sepse sipas tij, të tashmen shumë njerëz e përjetojnë në mënyra të ndryshme. "Për të tashmen ka secili nga një përjetim personal, e shkuara dihet si është dhe nuk më takon mua të shkruaj për të, ndërsa e ardhmja është ajo që njerëzit i tremben. Atë nuk e njohin, kanë gjithnjë kureshtje. Njerëzit nuk thonë si ishte dje, por si do të jetë nesër? Perspektiva është tek e ardhmja, ndaj e shkrova këtë libër. Ndoshta herës tjetër do të shkruaj edhe për kohëra të tjera", kështu shprehet Enisi, fantazia e të cilit i kapërcen shekujt. "Në vitin 2367, banorët e Tokës kanë takimin e parë me alienët, siç i quanin ata banorët e tjerë të universit. Dhe këta vinin prej galaktikës së Andromenës, nga planeti Bezuran, pak më i madh se Toka, por shumë më i zhvilluar. Deri në atë kohë, qytetërimi i saj e kishte degraduar tokën, aq sa ajo nuk mund të arrinte kurrë ato nivele zhvillimi të ëndrrave tona, me njerëz të plotfuqishëm e të pavdekshëm, me zhvillim të paimagjinueshëm... Ishte më keq se në Epokën e Gurit... Popullsia e Tokës kishte rënë në 1 miliard e gjysmë banorë, sa çereku i vitit 2007...". "Habitshëm ai ka ditur të pajisë rrëfimin e tij me ato elemente që e bëjnë lexuesin e çdo moshe, sidomos të rinjtë, të kërkojë deri në fund, me kureshtje, përfundimin e historisë, mbarimin e fabulës, fatin e personazheve, kryerjen e rrëfimit letrar" Artan Fuga, shkëputur nga parathënia.