Kapitalizmi i pjesemarrjes

Ndërkohë që kapitalizmi ka pasur një zhvendosje nga sfera materiale (p.sh., prona) te ajo simbolike (p.sh., financa e tregjeve / bursa), tashmë, në këtë fazë, jetojmë një kapitalizëm që shkon përtej simbolikes dhe i nënshtrohet rregullave të centrifugës teknologjike dhe globalizimit virtual. Tashmë, pjesa më e madhe e botës (asaj materiale, siç e kemi njohur) jeton njëkohësisht edhe në një botë tjetër paralele të mundësuar nga inteligjenca artificiale, realiteti virtual, rrjetet sociale, etj. Kjo ndodh sepse, në fakt, siç thoshte edhe Peter Drucker, globalizimi nuk është një dukuri ekonomike, por thelbësisht psikologjike. Njerëzimi sot merr pjesë dhe prodhon vlerë në një botë që i largohet gjithmonë e më shume asaj reale. Kjo “botë e re”, kapitalizon pjesëmarrjen e shumicës në favor të pakicës duke e përjashtuar shumicën nga zinxhiri i vlerës. Prandaj, pikëpyetja e madhe që ngrihet është: a duhet që bota virtuale – ajo e internetit, e tej pasuruar – t’i rinjohë një pjesë të pasurisë botës reale (asaj fizike, materiale)?