Rosa Liksom (1958) është  një nga shkrimtaret dhe artistet më të njohura finlandeze. Lindi në provincën e Laponisë, në veri të Finlandës. Në moshën 17-vjeçare u shpërngul në Helsinki, ku studioi antropologji në Universitetin e Helsinkit. Lëvizi për disa kohë nëpër Europë. Për katër vjet jetoi në Kopenhagë dhe në Paris. Jetoi edhe në veri të Norvegjisë e në Islandë dhe më pas ndoqi studimet antropologjike në Universitetin e Moskës. Më 1987 u kthye përsëri në Helsinki.

Librin e parë, një vëllim me tregime, e botoi më 1985: Një natë ndalesë (Yhden yön pysäkki), i vlerësuar me çmimin J. H. Erkko. Prej atëherë i është kushtuar letërsisë dhe ka botuar 8 vëllime me tregime, 7 romane dhe 2 libra për fëmijë.  Disa prej librave të saj janë ekranizuar me sukses. Rosa Liksom është mjaft e vlerësuar për krijimtarinë e saj dhe ka fituar çmimet më të rëndësishme letrare nordike dhe finlandeze.

Lexuesi shqiptar ndeshet për herë të dytë me këtë shkrimtare që vjen nga Finlanda. Libri i parë i përkthyer në shqip është “Kabina Nr. 6”.