Poezi nga Charles Baudelaire

Të përkthesh poezinë e Charles Baudelaire gjithmonë është konsideruar një mision i vështirë.

Në shqip kanë ardhur disa nga poezitë e tij, madje janë botuar edhe vëllime, por ky botim është një përpjekje serioze që lexuesi ynë të marrë më të mirën prej këtij themeluesi të modernitetit, i cili me vargun e tij magjepsi dashamirësit e poezisë në mbarë botën.

Në pasthënien e librit, nismëtari i përgatitjes së kësaj antologjie, Alket Çani, thotë për këtë botim: “Nga të gjithë poetët e tjerë të kohës së tij, Baudelaire më dukej më i veçanti dhe i pazakonti dhe e lexoja e rilexoja me një kureshtje e vëmendje të madhe.

Ky poet më kishte joshur me artin e tij, ku kufijtë mes së mirës dhe së keqes zhvendoseshin, një art që i bënte legjitime të gjitha prirjet e natyshme dhe i flakte tej, si sentimentale apo morale, zgjedhat e opinionit. Më kishte joshur me ngjyrat e zymta e të larmishme, me forcën e revoltës e, sidomos, me zërin e tij origjinal që thërriste impulset më të fshehta të qenies, duke nxjerrë një konceptim të ri për artin nga misteri, i analizuar mprehtësisht, i gjërave të botës”.