Ditenetet e Mirele J

Histori dashurie, elegji për dashuri ende të gjalla. Sa e rëndësishme mund të jetë një dashuri e madhe dhe brenda jetës së një personi krejtësisht të pavarur. Shpaloset gruaja brenda saj, gruaja pjesë e padukshme, gruaja e fortë dhe e dobët njëkohësisht.

Një dashuri e ndarë oqeanesh, e destinuar të harrohej. Ngelur muzë kujtimesh. Por fatet çuditërisht përsëriten….

Një personazh, një ngjarje e jetuar, zgjon brenda lexuesit instiktin e rrëfimit. Nuk ka të bëjë me të ardhmen e romanit. Është tepër arbitrare, por është pika e zanafillës.
REVIEW

Them me bindje se ky libër është krejt i veçantë në letërsinë tonë. 
Është misteri i një dashurie, sa e hapur aq edhe e fshehtë, plot të papritura dramatike që mbajnë gjallë kureshtjen deri në faqen e fundit. Personazhe të ditëve tona, por edhe të një kohe të shkuar, që vijnë të gjallë me dritëhijet e dilemat e tyre të mëdha. Ata jetojnë e veprojnë në një sfond gjeografik që shtrihet që nga fshatrat e thella të Shqipërisë Alpine në Tiranën moderne e deri në Nju-Jorkun e sotëm.
Është një histori origjinale e shkruar me një stil tepër vetjak, që rrjedh natyrshëm, pa sforcime e ngërçe me një thjeshtësi e strukturë të gjetur, falë talentit të lindur.
Si filmbërës i hershëm më duket sikur jam para ekranit, ku sekuencat me vërtetësinë e tyre më futin në një botë magjike plot ngjarje e të papritura. Ndërsa, si lexues, i pandarë kurrë nga librat, më pëlqen ky krijim i ri i Valentina Hysit, sepse është shkruar me mjeshtëri, lirshëm dhe plot trope letrare, ku gjen një pjesë të jetës, me gëzimet, humbjet, terrin e dritën e saj...
Ylli Pepo, Artist i Merituar