Kurora me banane – La corona di banane

Përshtypje nga Prof. Dr. Klara Kodra:

Fabulat e Shkëlzen Zallit janë fabula të gjalla dhe plot jetë dhe që të bëjnë të mendosh. Ato e respektojnë lexuesin, pra janë për një publik jo aq fëmijësh, sa adoleshentë, madje edhe të rritur. Janë fabula realiste ku nuk mungojnë ngjyrat e vrazhda dhe ndeshet lufta e vazhdueshme për ekzistencë. Në to ka edhe një personazh gjithkund të pranishëm por askund të dukshëm” siç e përfytyronte Floberi autorin, pikërisht vetë poeti që buzëqesh, tallet, ironizon me realitetin po beson tek disa vlera që janë e kundërta e antivlerave të ironizuara, lëvizja e përhershme që i kundërvihet të qëndruarit në vend, puna krijuese që i kundërvihet përtacisë dhe mburrjes së kotë, ndjeshmëria që u kundërvihet shpirtthatësisë dhe egoizmit, modestia që i kundërvihet mburrjes.

Në fabulat e Shkëlzen Zallit ndeshet poeti humoristik dhe satirik, vëzhguesi i mprehtë i realitetit, njohësi i shpirtit njerëzor. Aty shprehet poeti edukues i brezit të ri, po edhe poeti i vërtetë që e ka të vetvetishme këngën si bilbili dhe pranon më tepër të tretet nga kjo këngë sesa të kërkojë qetësinë.