Shkelzen Zalli ishte poet, autor i librave për fëmijë dhe gazetar që ka punuar për rreth 30 vjet në Radio Tirana, duke drejtuar dhe përgatitur shumë emisione për fëmijë si: “Mikrofoni i qershizave”, “Kolovajsa e pasdites”, “Në vallen e rritjes sonë”.

Autor i rreth 45 librave për femijë, në zhanrin e poezisë, poemës, fabulës, përrallës, skicave dhe tregimeve, krijimtaria e tij prej shumë vitesh është pjesë e kurrikulës shkollore të ciklit të ulët. Mes tyre vlen të përmenden: “Gjergji takon Skënderbeun”, “Ditari i maces”, “Pësimet e Benit”, “Treni me gaztorë” etj.

Ai spikati me stilin lirik, temat interesante, mendimin filozofik, edukues dhe atdhetar, leksikun e veçantë dhe figuracionin plot fantazi e shpesh ironik ndaj veseve njerëzore.

Shkëlzen Zalli u bë pjesë e jetës së femijëve shqiptarë për shumë breza, përmes poezive plot elementë stilistikë që ishin pjesë e individualitit të tij jetësor dhe letrar.

Fitues i shumë çmimeve letrare për fëmijë në Shqipëri, Kosovë dhe rajon, vitin e kaluar Shkëlzen Zalli u nderua me Çmimin Kombëtar të Letërisë për Femijë, akorduar nga Ministria e Kulturës e Shqipërisë.

U nda nga jeta më 18 maj të vitit 2020.

Më poshtë japim disa nga titujt e librave për fëmijë:

   Shtëpia e pranverës - poezi për fëmijë - 199?

   Përtej fytyres: poezi - 1998

   Hënën nuk e pastroj dot - vjersha dhe poema për fëmijë - 2000

   Pësimet e Benit: poezi - 2001

   Liria ime e vogël - poezi - 2002

   Don Benkishoti në bjeshkë : tregime në vargje - 2005

   Bleta e Abetares : vjersha, fabula, vizatime për ngjyrosje - 2006

   Kur zogu prap të hyjë në vezë : vjersha humoristike, fabula - 2006

   Ku më humbi nëna?! - përralla - 2007

   Dielli nën mjegull - lirika - 2007

   Lugina e shelgjeve - tregime - 2008

   Kush banon te syri : vjersha - 2008

   Shkronjat në shtëpinë e fjalës - 2009

   Gjëza për t'u gjetur - 2011

   Si u dogj ëndrra - përralla - 2011

   Leci kërkon një Nastradin : vjersha, humoristike - 2011

   Zogj të bardhë - poezi për fëmijë - 2012

   Gomari pa një... vesh - fabula dhe tregime humoristike për fëmijë - 2013

   Dita të ka pritur - poezi për fëmijë - 2013

   A kanë zogjtë edukatore - vjersha - 2014

   Kurora me banane - fabula - 2015

   Ditari i maces - 2015

   Perëndimi i vesës - poezi - 2015

   Gjergji takon Skënderbeun - poemë, poezi për fëmijë - 2018

   Kartolina e zileve - poezi për fëmijë - 2019