Frederik Rreshpja është një nga poetët më të mirë të letërsisë shqipe të gjysmës së dytë të shekullit të XX. Një pjesë e veprës së tij është në dorëshkrim

Për të njohur më mirë jetën dhe veprën e Frederik Rreshpjes, po ndajmë për lexuesit edhe një autobiografi të tijën:

1940 — U lind në Shkodër më 19 korrik.

1957 — Arrestohet në vitin e II Gjimnaz për agjitacion e propagandë kundër pushtetit, dënohet me tre vjet burgim.

1959-1961 — Përgjegjës i shtëpisë së kulturës në Bajzë të Shkodrës.

1961-1963 — Arsimtar në Dukagjin.

1963 — Student në Universitet dega gjuhë-letërsi.

1964 — Arrestohet sërish për agjitacion e propagandë, dënohet 3 vjet burg.

1966 — Redaktor në gazetën “Puna”. Shëtit për një vit si gazetar në gjithë gazetat dhe përfundon në gazetën “Drita” me ndërhyrjen e I. Kadaresë. Po atë vit formon gazetën lokale të Shkodrës “Jeta e Re”.

1966-1968 — Punon si piktor në Fabrikën e Letrës Shkodër.

1968-1971 — Punon ekonomist në Ndërrmarjen e Ndërtimit.

1971-1974 — Me ndërhyrjen e Dhimitër Shuteriqit dhe miratimin e Ramiz Alisë del në profesion të lirë si shkrimtar.

1974-1976 — Arsimtar në Shkodër.

1976-1980 — Dënohet dhe kryen dënimin në Spaç për arsye politike.

1981-1984 — Merret me tregëti të paligjshme për kohën.

1984 — Arrestohet prapë; pas 1 viti hetuesi lirohet për mungesë provash.

1986 — Arrestohet prapë me akuzën “spiunazh në shërbim të KGB-së dhe CIA-s” nëpërmjet një marinari polak. Lirohet pas 10 muajsh hetuesi për mungesë provash.

1988-1989 — Shtrohet në spital.

1989 — Arrestohet për krijimin e një partie socialdemokrate. Lirohet në vitin 1990 para ardhjes së kryetarit të OKB-së Peres De Kuelar.

Botimet

1968 — “Rapsodi Shqiptare”, poezi.

1969 — “Trimi i fshatit Bardhë”, tregime për fëmijë; “Trofta Hutaqe”, përralla; “Eranda”, tregim i ilustruar.

1971 — “Ëndrra e Gurit” (dramë) u vu në skenë nga Ali Oseku, që më pas u arrestua për këtë si skenograf.

1972 — “Zëri i Largët i kasolles”, roman.

1973 — “Në këtë qytet”, poezi.

1975 — “Enise, Enise”, poezi, botuar në Prishtinë.

1974 — I hiqet e drejta e botimit pa afat.

1993 — “Erdhi ora të vdes përsëri”, poezi.

1994 — “Trofta hutaqe”, përralla, ribotim i përpunuar.

1996 — “Lirika të zgjedhura”, poezi.

Gati për proces botimi (të shkruara)

— “Çeku i bardhë”, dramë.

— Një libër me përralla.

— “Ballkani i Perëndisë”, roman.

— “Çarlsi investitor në Shqipëri”, roman humoristik.

— “Vetmi”, poezi.