Roger Scruton ka lindur në vitin 1944 dhe u nda nga jeta më 12 janar 2020. Ai është një nga mbështetësit më të vendosur të konservatorizmit, ka një kontribut të gjerë e të thellë në filozofi, në mendimin politik dhe në përkufizimin e disa prej sfidave më të mëdha, mes tyre: demokracia, kombi, të drejtat,  feja, morali, e mira e përbashkët, etj. Mediat britanike e kanë cilësuar si filozofin më të arrirë të Britanisë së Madhe, që prej kohës së Edmund Burke-es, dhe një yll që rrezellit në mendimin e sotëm filozofik.  Ka punuar si Profesor i Filozofisë në disa prej universiteteve më prestigjoze të botës përfshirë këtu Oxfordin, Cambridge, etj, është autor i më shumë se 30 librave, disa prej të cilëve gjenden tashmë në panteonin e literaturës filozofike, politike e sociale, shkrimtar i dy romaneve dhe shumë punimeve të tjera mbi filozofinë, artik, kulturën, estetikën, fenë, etikën, moralin, si dhe kompozitor i dy operave. Mbante titullin Sir dhënë nga Mbretëresha e Anglisë. Ai u nda nga jeta pas një sëmundje të rëndë, në moshën 75-vjeçare.