Bardhyl Xhama lindi në Fterrë të Sarandës, më 30 qershor 1934. Pasi kreu shkollën fillore në vendlindje, shtatëvjeçaren dhe të mesmen i përfundoi në Gjirokastër, në gjimnazin “Asim Zeneli” me rezultate të shkëlqyera. Arsimin e lartë e kreu në Universitetin e Tiranës për gjuhë shqipe dhe letërsi.

Fillimisht punoi si mësues e drejtor gjimnazi në Gjirokastër, Delvinë e Sarandë dhe më pas u transferua në Tiranë, ku për më se njëzet vjet rresht punoi si redaktor e sekretar kolegjiumi në gazetën “Mësuesi”, zëvendësdrejtor në Shtëpinë Botuese të Librit Shkollor dhe shef i sektorit të Gjuhës dhe Letërsisë në Institutin e Studimeve Pedagogjike.

Falë punës së tij është vlerësuar me Urdhrin “Naim Frashëri” të Klasit II dhe III, si dhe me titullin “Mësues i Merituar”.

Në 70-vjetorin e lindjes u nderua me “Çmimin e Karrierës”.

Është një nga shkrimtarët e njohur të letërsisë për fëmijë e të rinj. Ka botuar 13 libra artistikë, romane, novela, vëllime me përralla dhe vëllime me rrëfenja. Tetë nga librat e tij janë nderuar me çmime në konkurset kombëtare të letërsisë për fëmijë e të rinj.

Vitet e fundit i është kushtuar kryesisht rrëfenjave të shkurtra, që e marrin tematikën nga fjalët e urta të popullit tonë.

Është pensionist që nga viti 1989, por gjithmonë në veprimtari krijuese. Ndihmesë të veçantë ka dhënë në krijimin, drejtimin dhe mbarëvajtjen e Shoqatës Mbarëkombëtare të Letërsisë për Fëmijë e të Rinj.