Vasily Semyonoviç Grossman [1905 - 1964], shkrimtar dhe gazetar rus, lindi në një familje hebreje në Ukrainë, në atë kohë pjesë e Perandorisë Ruse. Nga viti 1910 deri në 1912-ën, jetoi së bashku me nënën, në Gjenevë pasi prindërit e tij ishin ndarë. U transferua në Kiev në vitin 1914, dhe jetoi me babain, ku ndoqi edhe mësimet në Institutin e Lartë të Arsimit. Mbas mbarimit të ciklit në institut, u regjistrua për inxhinieri kimike në Universitetin Shtetëror të Moskës. Për shkak të pasionit dhe rezultateve shumë të larta, shokët e thërrisnin Vasia Kimiku. Pas diplomimit u emërua dhe filloi punë në Basenin e Donetskit. Në fillimin e viteve ‘30, e braktisi karrierën e kimistit duke iu kushtuar letërsisë.

Tregimet e para të botuara patën përkrahjen e Gorkit dhe të Bulgakovit. Deri në vitin 1937 kishte botuar dy përmbledhje me tregime dhe romanin e parë. Më 1937 u pranua në Unionin e Shkrimtarëve Rusë. Gjatë Luftës së Dytë Botërore punoi si korespodent i gazetës së Ushtrisë së Kuqe “Krasnaja Zvezda”. Përveç kronikave nga fronti i luftës, shkroi edhe tregime për betejat e Moskës, Stalingradit, Kurskut dhe Berlinit. Raportet e Grossmanit mbi kampin nazist të shfarosjes në Treblinka, ishin ndër rrëfiet më të tronditëse mbi kampet e vdekjes, shkruar nga një reporter lufte.

Në vitin 1944 së bashku me Ilia Erenburgun botoi “Libri i Zi”, vepër mbi përndjekjet dhe krimet e nazizmit ndaj komunitetit hebre, ndërsa në 1946-ën botoi romanin “Kolcugini i Ri”. Në vitin 1960 shkroi romanin “Jeta dhe Fati”.

Për shkak të përmbajtjes, edhe pse KGB-ja nuk e arrestoi, e bastisi banesën e Grossmanit dhe sekuestroi dorëshkrimet, shënimet dhe shiritin e makinës së shkrimit me të cilën ishte shkruar kjo vepër. Ideologu kryesor i Partisë Komuniste, Mikhail Suslov tha se libri nuk mund të botohej për dy ose treqind vjet. Një kopje e fshehur e dorëshkrimit arriti, të dilten jashtë Rusisë dhe të botohej nga disidentët Sakharov dhe Voinovich në Zvicër, në vitin 1980. Tetë vjet më vonë “Jeta dhe Fati” u botua në Moskë.

Vasily Grossman është autor i shumë romaneve dhe librave me tregime.