Alice Munro ka lindur më 10 korrik 1931 në jugperëndim të Ontarios në Kanada. Ajo ka studiuar për anglisht dhe gazetari ku është diplomuar në në Universtetin e Ontarios Perëndimore. Që kur ishte adoleshente nisi të shkruajë tregimet e para. Përmendet tregimi “Dimensionet e errësirës” (1950). Jeta e Munro ka pasur shumë aventura, pasi ka ushtruar shumë punë të ndryshme, ku vlen të përmendet edhe puna si librare. Njohja me profesorin James Munro, dhe më tej martesa me të, i krijoi mundësinë që të njihet me letërsinë dhe të hapë një librari me emrin Munro, e cila vazhdon aktivitetin edhe sot e kësaj dite.

Alice Munro ka shkruar më shumë se 15 vëllime me tregime, si dhe disa përmbledhje nga krijimtaria e saj, apo rishikime të tregimeve që ka shkruar më parë, një tipar karakteristik i krijimtarisë së saj letrare.

Gjatë karrierës së saj të spikatur është nderuar me shumë çmime dhe trofe, përfshirë tre Çmime Letrare të Guvernatorit të Përgjithshëm të Kanadasë, Çmimin “Giller”, Çmimin “Rea” për Tregimin e Shkurtër, Çmimin Letrar “Lannan”, Çmimin “W.H. Smith” për Librin, që jepet në Angli, Çmimin e Rrethit Kombëtar të Kritikës Letrare të Shteteve të Bashkuara dhe një Çmim Ndërkombëtar “Man Booker”. Tregimet e saj janë botuar në “The New Yorker”, “The Atlantic Monthly”, “The Paris Review”.

Në vitin 2013 ka fituar çmimin Nobel në letërsi për “mjeshtri në tregimin bashkëkohor. Në vitin 2009 ka fituar çmimin Man Booker Prize.

Munro kaloi një sëmundje të rëndë në vitin 2009 dhe që prej asaj kohe jeton e tërhequr nga bota aktive letrare. Ajo ka pasur dy martesa, ku me martesën e parë ka lindur tre fëmijë, ku njëri prej tyre vdiq sapo erdhi në jetë. Sheila Munri, njëra nga vajzat e saj, botoi në vitin 2002 një libër me kujtime: “Jetët e nënave dhe vajzave: Rritja me Alice Munro”.