Ermal Mamaqi lindi në Tiranë, më 21 mars 1982. Që në fëmijëri ishte i qartë për atë që dëshironte të bëhej në të ardhmen dhe i shkoi realizimit të ëndrrës së tij deri në fund.

Studimet e larta i kreu në fushën e kantos, pranë Akademisë së Arteve në Tiranë. Më tej, vijoi karrierën si këngëtar i muzikës moderne, duke i dhuruar publikut shqiptar disa suksese.

Ndër vite, falë guximit dhe nevojës për të shfaqur të gjithë potencialin e tij, Ermali ka pasur një përvojë të suksesshme në disa fusha.

Prezantues, komedian, producent filmash, janë vetëm disa nga profilet ku e kemi parë të shfaqet. Rekordmen në kinema, me dy filmat më të shitur në Shqipëri “Dy gisht mjaltë” dhe “I LOVE TROPOJA”.

Së fundmi, misioni i tij është të ndihmojë të tjerët që të kuptojnë më mirë veten dhe ligjet e suksesit. Me trajnimin “Mendo, Ndrysho, Fito”, ai ka prekur dhe ka ndryshuar jetët e mijëra njerëzve.

Libri “Në garë me veten” vjen si një tjetër përpjekje e tij për të nxitur këdo që të zbulojë maksimumin e potencialit që fsheh brenda vetes.