Arlinda Çausholli është gazetare, publiciste dhe eksperte komunikimi me influencë, me një përvojë 20-vjeçare dhe prozatore. Që nga viti 2006, është drejtoreshë Komunikimi në Aeroportin Ndërkombëtar të Tiranës “Nënë Tereza”.

Karrierën e saj e filloi në gazetari, në vitin 1993 me “Gazeta Shqiptare” dhe më pas me agjencinë amerikane të lajmeve, “Associated Press”, në vitet 1997-2002 duke mbuluar konfliktet që u shënuan asokohe me përmbysjen e skemave piramidale dhe më pas me luftën në Kosovë.

Ka punuar për gazetën e njohur Corriere della Sera, duke mbuluar zhvillimet më të rëndësishme në Shqipëri në periudhën e tranzicionit të këtyre viteve.

Në vitet 2003-2006 ka qenë drejtuese Komunikimi në Zyrën e Kombeve të Bashkuara për Projektet e Shërbimeve (UNOPS).

Arlinda Çausholli është diplomuar në degën Gjuhë-Letërsi, në Fakultetin“Luigj Gurakuqi” në Shkodër dhe mban gradën Master për Shkenca Komunikimi në Universitetin Europian të Tiranës (UET) në vitin 2011, duke u nderuar me “Çmimin e Ekselencës”.

Njihet si pedagoge dhe anëtare e Bordit Drejtues të UET Alumni dhe mban titullin e Koordinatores Rajonale të Shoqatës Europiane të Drejtorëve të Komunikimit EACD (European Association Communication Directors) për Shqipërinë. Ajo është autore e blogut “Ndër mejtime” që publikohet periodikisht tek e përditshmja Shqiptarja.com, një blog mbi jetën, njerëzit dhe fenomenet sociale që synojnë përparimin e vlerave humane dhe vëmendjen publike ndaj tyre.

Arlinda Çausholli është nderuar me “Çmimin e Mirënjohjes“për kontributin që ka dhënë në jetën shoqërore dhe artistike në qytetin e Shkodrës.

Është themeluese, ideatore dhe drejtuese e Programit të Komunikimit „Fit For Future“ (FFF), një Program që ka për qëllim të promovojë cilësinë e komunikimit profesional dhe njerëzor, të japë nota të mendimit pozitiv dhe të krijojë një frymë bashkëpunimi qytetar.